ՀայերենEnglishРусский

Ծառայություն

Մեր պատմությունը

     ԼՂՀ արտակարգ իրավիճակների վարչության ստեղծման պատմությունը

    1990թ. մայիսի 24-ին ԼՂԻՄ մարզգործկոմի որոշմամբ ստեղծվեց «Արցախ» փրկարար ծառայությունը, որի հիման վրա 1995թ. ԼՂՀ կարավարության որոշմամբ՝  արտակարգ իրավիճակների վարչությունը:
 Լեռնային Ղարաբաղում փրկարար ծառայության ստեղծման գաղափարը հասունացավ 1988թ-ի ավերիչ երկրաշարժից հետո, որը պատճառ դարձավ տասնյակ հազարավոր զոհերի և վիթխարի ավերածությունների՝ ծանր վիշտ պատճառելով ողջ հայ ժողովրդին: Թերևս պակաս ծանր չէր արցախցիների վիճակը, որոնք առաջին քայլերն էին անում ազգային ազատագրական պայքարի դժվարին ճանապարհին: Արցախցիներից կազմավորված կամավորական խմբերը առաջիններից մեկն էին, որոնք հասան աղետի գոտի: Տասնութ օր ու գիշեր աշխատելով արտերկրից ժամանած արհեստավարժ փրկարարների հետ միասին՝ արցախցիները իրենց համեստ ավանդը ներդրեցին երկրաշարժի հետևանքների վերացման գործում՝ ձեռք բերելով փրկարարական աշխատանքների գործնական փորձ: Աղետի գոտուց վերադառնալուց անմիջապես հետո Ասլան Գրիգորյանը ձեռնամուխ է լինում Արցախում փրկարար ծառայության ստեղծմանը, որը մինչև 1990թ. գործում էր հասարարակական հիմունքներով:
  1991թ. Լեռնային Ղարաբաղի Հանրապետության հռչակումից հետո Ադրբեջանի կողմից սկսվեցին խաղաղ բնակավայրերի հռթիռահրետակոծությունները: Ամենուրեք զգացվում էր փրկարարների կարիքը: Երբ Շուշիում տեղադրված «Գրադ» կայանքներից հաճախակի հրթիռակոծվում էր մայրաքաղաք Ստեփանակերտը՝ փլատակների վերածելով շենքերն ու շինությունները, փրկարարները առաջիններից էին օգնության հասնում՝ փլատակներից հանելով տուժածներին՝ տեղում ցուցաբերելով առաջին բուժօգնություն:
  1992թ. հունվարին, երբ Ադրբեջանը սանձազերծեց ակտիվ ռազմագործողությունները, «Արցախ» փրկարար ծառայության անդամներից կազմավորվեց մարտական ջոկատ, որն անցավ ինքնապաշտպանական ուժերի ենթակայության տակ: Փրկարարների մի խումբ էլ փրկարարա-որոնողական աշխատանքներ էր իրակակացնում մայրաքաղաքի ռմբահարումներից հետո: Մարդկային կյանքեր փրկելու համար աննկարագրելի տոկոնություն և համարձակություն են ցուցաբերել փրկարարները՝ ռազմագործողություների առաջավոր գծից և փլատակներից դուրս բերելով հազարավոր վիրավոր ազատամարտիկների և խաղաղ բնակիչների:
 Պատերազմի տարիններին արտերկրի մի շարք երկրների փրկարարական ծառայությունների ներակայացուցիչներ ժամանել են Արցախ՝ ծանոթանալու և ուսանելու ռազմագործողություններին զուգընթաց իրականացվող փրկարարական աշխատանքներին, որը նորույթ էր և նմանատիպ փորձ համաշխարհային փրկարարական պրակտիկայում մինչև այդ գոյություն չուներ:
  1993թ. ԼՂՀ Պաշտպանության պետական կոմիտեի նախագահի հրամանագրով հանրապետության քաղաքացիական պաշտպանության շտաբի ֆունկցիաները դրվեցին «Արցախ» հանրապետական փրկարար ծառայության վրա: 1995թ. ԼՂՀ կառավարության որոշմամբ «Արցախ» հանրապետական փրկարար ծառայության և քաղ. պաշտպանության շտաբի հիման վրա ստեղծվեց ԼՂՀ Արտակարգ իրավիճակների վարչությունը:
 Հրադադարից հետո փրկարարների որոկավորման կատարելագործման, արտակարգ իրավիճակներում վթարափրկարարական և այլ անհետաձգելի աշխատանքների իրականացման ու բնակչության պաշտպանվածության մակարդակի բարձրացման նպատակով պարբերաբար կազմակերպվում են տարբեր թեմաներով ուսումնավարժական միջոցարումներ:
 Ելնելով բնակչության պաշտպանության անվտանգության միասնական համակարգ ստեղծելու նպատակից, 2001թ. մարտին ԼՂՀ կառավարության որոշմամբ Արտակարգ իրավիճակների վարչությանն է միացվել հրդեհային պահպանության ծառայությունը:
  Արտակարգ իրավիճակների վարչությունը իր գործունեության շնորհիվ  վաղուց արժանացել է նաև միջազգային ճանաչման: Մեր փրկարարները բազմիցս մասնակցել են տարամասշտաբ միջազգային ուսումնավարժությունների և սիմպոզիումների՝ իրենց արհեստավարժությամբ արժանանալով հեղինակավոր միջազգային փրկարարական կազմակերպությունների բարձր գնահատականին՝ բազմիցս պարգևատրվելով մեդալներով և պատվոգրերով: 2000 թվականից ԼՂՀ Արտակարգ իրավիճակների վարչությունը փրկարարների միջազգային կոնֆեդերացիայի լիիրավ անդամ է: